應付”極品”親戚，你準備好未?
無論你係來自大家庭定小家族，我相信每個人身邊都總會有賤格親戚，啲三姑六婆唔搬弄是非硬係唔安樂。我記得第一次令我O咗咀嘅問題喺我啱啱升上大學個暑假，佢哋問我升咗邊間大學，我都未答佢哋已經自己搶答咗。
- 梗係入香港大學啦，唔入最好有咩用呀？
- 最好就似你堂家姐咁去外國讀，返黎英文laklak聲。
- 唓，女人嫁得好咪得囉...
哈! 你哋以前Oral discussion一定係攞A。
而對於我呢種所有堂兄弟姊妹已經成家立室而除咗我一個之外嘅港女，過年必定追問我幾時有男朋友幾時結婚點解要咁揀擇，問完一年又一年，都真係好煩膠！ 對上一次做冬，我個親戚同我講: 就黎連呀B(我10歲嘅姪女)生埋你都未生呀。嘩，人話嚟㗎喎(平音聲)。基本上，應付呢啲極品認真答必定死硬，要用"兜兜轉轉就係唔答你"嘅答法，要完全無重點千萬唔好講真話；而對住市儈嘅嘅親戚可以試下一味講錢。
有無男／女朋友？
盡量唔好話無拍拖，啲親戚有可能會幫你分析中女嫁不出原因上中下集，真係要反枱先走得甩。
我前嗰幾年大概咁答: 有呀，有好多個忝。
幾時結婚？
千祈唔好話”仲未想結婚”，如果唔係閣下將會可能被在場所有心靈導師開導，只會令下場更慘。
我今年會咁答: 快㗎啦，你幫我俾埋半島酒店嗰80圍尾數我就結㗎喇！
幾時生仔？
假若你話”正在努力中”，聽喺親戚耳裏可能係你或者你另一半”能力”有問題…到時佢哋教番你轉頭就真係得啖笑。
我將來可能會咁答: 出緊黎喇出緊黎喇。
不如大家都一齊分享一下妙問妙答呀?
#女人像鹽 #我已經準備好 #極品親戚 #妙問妙答
Search